राधाकृष्ण विखे पाटील : उद्योगमंत्र्यांसमवेत बैठक
विळद दि.9 मार्च 2025
विळद येथील नवीन होणाऱ्या विस्तारित एमआयडीसीचे भूमिपूजन एप्रिल महिन्यात उद्योगमंत्री उदय सामंत यांच्या उपस्थितीत होणार आहे.
गुरुवारी उद्योगमंत्र्यांच्या उपस्थितीमध्ये मुंबईत मंत्रालयात यासंदर्भात बैठक झाली. या बैठकीस पालकमंत्री राधाकृष्ण विखे पाटील, आमदार मोनिका राजळे, आमदार काशीनाथ दाते, डॉ. सुजय विखे पाटील, महाराष्ट्र प्रदूषण कंट्रोल बोर्डचे अधिकारी, कामगार विभागाचे अधिकारी, तसेच प्रशासकीय अधिकारी व पारनेर तालुक्यातील प्रतिनिधी गणेश शेळके, सुजित झावरे, विजू औटी, राहुल शिंदे, सचिन वरात आदी उपस्थित होते.
विळद परिसरात होणारी विस्तारित एमआयडीसी, सुपा एमआयडीसीतील उद्योजकांच्या विविध प्रश्नांसंदर्भात बैठकीत चर्चा झाली. सुपा एमआयडीसीतील उद्योजकांना कोणताही त्रास होणार नाही, उद्योजकांनी कुणाच्याही दबावाखाली काम करू नये, यावर बैठकीत चर्चा झाली. उद्योजकांना’वन विंडो सिस्टिम’ने काम करण्याच्या सुलभतेच्या दृष्टिकोनातून एमआयडीसीचे डेप्युटी सीईओ यांच्या अध्यक्षतेखाली एक समिती स्थापन करण्यात आली. यामध्ये कामगार विभागाचे प्रतिनिधी व महाराष्ट्र प्रदूषण बोर्डचे प्रतिनिधी यांच्या मार्गदर्शनाखाली समिती स्थापन करण्यात आली आहे. ही समिती प्रत्येक उद्योजकांशी स्थानिक पातळीवर चर्चा करून त्यांच्यासमोर असलेल्या अडचणी व सोडवणूक करून तेथे त्यांना उद्योग वाढविण्याच्या दृष्टिकोनातून योग्य ती मदत करेल, असा निर्णय बैठकीत घेण्यात आला आहे, अशी माहिती माजी खासदार डॉ. सुजय विखे पाटील यांनी दिली.
नगरमध्ये होणाऱ्या या एमआयडीसीमुळे उद्योगधंद्याला अधिक चालना मिळेल, अशी ग्वाही उद्योगमंत्री उदय सामंत यांनी दिली. तसेच नगर जिल्ह्यातील मंजूर झालेल्या शिर्डी, श्रीगोंदा, नवीन नगर येथे अनेक उद्योगधंदे आणण्यासाठी तसेच जास्तीत जास्त रोजगार वाढवण्यासाठी उद्योग विभागाकडून प्रयत्न केले जातील अशी खात्री मंत्री सामंत यांनी दिल्याचे विखे पाटील यांनी सांगितले.
सुप्यामध्ये उद्योग वाढला पाहिजे व उद्योग वाढत असताना स्थानिक भूमिपुत्रांनासुद्धा काम करण्याची संधी मिळावी, यासाठी नवीन येणाऱ्या उद्योजकांनी प्रयत्न करावा, अशी विनंती पालकमंत्री राधाकृष्ण विखे पाटील यांनी केली. या बैठकीदरम्यान काशीनाथ दाते यांनी आभार मांडले.
