विसापूर दि.10 नोव्हेंबर 2023

जिल्हा सहकारी बँकेच्या विविध कर्ज योजना शेतकऱ्यांसाठी लाभदायक आहेत.वेळेवर कर्जाची परतफेड केल्यास त्या फायदेशीर ठरत असल्याचे प्रतिपादन जिल्हा सहकारी बँकेचे संचालक माजी.आमदार राहुल जगताप यांनी केले.

श्रीगोंदा तालुक्यातील सुरेगाव-घुटेवाडी विविध कार्यकारी सेवा सहकारी सोसायटीच्या सभादांना तेरा टक्के लाभांश जगताप यांच्या हस्ते गुरुवार दि. ९ रोजी वाटप करण्यात आला.आनंदाश्रम स्वामींच्या मठात वाटपाचा कार्यक्रम संपन्न झाला

यावेळी ते पुढे बोलताना जगताप म्हणाले की, शेतकरी सभासदांनी सेवा सहकारी सोसायटीचे कर्ज घेऊन वेळेत परतफेड केल्यास त्यांना शुन्य टक्के दराने पिक कर्ज वापरता येते. अशावेळी सेवा संस्थाही,सक्षमपणे काम करुन सभासदांना लाभांश वाटप करु शकते.

सुरेगाव सोसायटी जिरायत भागातील संस्था असूनही सक्षम असल्याबद्दल त्यांनी गौरव केला. कार्यक्रमाचे अध्यक्षस्थानी जेष्ठ संचालक भगवान घुटे होते. तालुका विकास अधिकारी पोपटराव व्यवहारे, खरेदी विक्री संघाचे माजी अध्यक्ष संभाजी घुटे, संस्थेचे अध्यक्ष विजय दारकुंडे, डॉ. अनिल मोरे, गुलाब रामफळे, संतोष लोखंडे, निलेश उदार यांनी मनोगत व्यक्त केले.

यावेळी कुकडीकारखान्याचे माजी संचालक अंकुशराव रोडे, जिल्हा बँकेचे गोपाळराव पवार, विसापूरचे शाखाधिकारी चंद्रकांत सरडे,पोपटराव रोडे, सुभाष वाळके, दत्तात्रय दारकुंडे, राजेंद्र रोडे,संतोष शिंदे, भगवान रोडे, ईश्वर लहाकर, गोवर्धन रोडे, सरपंचगोविंद घुटे, संदीप घुटे, नितीन शिंदे, बाबुशेठ राक्षे, गजाननपवार, गणेश रोडे, सुखदेव रोडे, रविंद्र रामफळे, संस्थेचे सचिवसंतोष वागस्कर, सभासद व कर्मचारी उपस्थित होते.

अहमदनगर दि.7 नोव्हेंबर 2023

नगर – वाढत्या सायबर गुन्ह्यांना आळा घालण्यासाठी तसेच नागरिकांमध्ये जनजागृती करण्यासाठी कोतवाली पोलिसांकडून पोस्टर्सचे वाटप केले जात आहे. कापड बाजारातील व्यापाऱ्यांच्या मीटिंग वेळी सदर कार्यक्रमाची सुरुवात करण्यात आली. आपली फसवणूक होऊ नये, यासाठी मोबाईल हाताळताना सतर्क राहणे गरजेचे असल्याचे पोलिस निरीक्षक चंद्रशेखर यादव यांनी यावेळी सांगितले.

दिवाळीचे पार्श्वभूमीवर शहरातील व्यापारी, नागरिकांना चोरी आणि फसवणूक टाळण्यासाठी व खबरदारी घेण्यासाठी कोतवाली चे पोलीस निरीक्षक यादव यांनी मीटिंग घेतली. यावेळी इतर सूचना देत पोस्टर्सचे वाटपची सुरुवात करण्यात आली.
नागरिकांकडून सायबर गुन्हे घडू नयेत म्हणून आवश्यक खबरदारी घेतली जात नसल्याने सायबर गुन्ह्यांचे प्रमाण वाढत आहे. मोबाईलचा वाढलेला वापर तसेच ऑनलाईन पैशांची देवाणघेवाण यातून सायबर गुन्हे घडत आहेत. काही वेळा सायबर चोरांकडून होत असलेल्या फसवणुकीची कल्पना येत नाही व मोठी फसवणूक होते. कोणत्याही अनोळखी व्यक्तीच्या क्रमांकावर आलेली मेल किंवा लिंकवर लगेच क्लिक करु नये, कोणतेही लोन ॲप मोबाईलमध्ये डाऊनलोड करु नये, सोशल मीडियावर अनोळखी व्यक्तींसोबत ओळख वाढवू नये, कोणालाली बॅंकची वैयक्तीक माहिती शेअर करु नये, अशा काही सूचना पो.निरीक्षक चंद्रशेखर यादव यांनी केल्या आहेत. दिवाळीमुळे कापड बाजारात खरेदीसाठी आलेल्या नागरिकांना सायबर जनजागृतीबाबत पोस्टर्स वाटप केले जात आहेत. अशा १०,००० प्रती छापण्यात आल्या असून त्याचे वाटप सुरू करण्यात आले आहे.

सदर मीटिंगवेळी व्यापारी असोसिएशनचे अध्यक्ष श्याम देडगावकर सेक्रेटरी किरण व्होरा व्यापारी महासंघाचे अध्यक्ष ईश्वर बोरा संभव काठेड सतीश मुथा दीपक नवलांनी रवी गांधी देवेंद्र भट्टेजा रवि किथानि ऋषि येवलेकर, योगेश गांधी चंद्रकांत चोपडा इतर व्यापारी उपस्थित होते.
………………….
याबाबत घ्या काळजी
डिजिटल तंत्रज्ञानाचा वापर, त्यामध्ये असणारे धोके, ऑनलाइन व्यवहार करताना घ्यायची काळजी आदी बाबींवर पोस्टर्सच्या माध्यमातून जनजागृती करण्यात आली. मोबाइलचा वापर अनावश्यक अपलोड किंवा डाउनलोडसाठी करू नये, आपला पासवर्ड परिचित व्यक्तीलाही सांगू नये, फसव्या मेलपासून सावध राहावे, अशी माहिती कोतवाली पोलिसांकडून देण्यात येत आहे.
………………….
फसवणूक झाल्यास तत्काळ संपर्क करा
ऑनलाईन आर्थिक फसवणूक झाल्यास तत्काळ बॅंकेशी संपर्क करुन अकाऊंट बंद करावे तसेच डेबिट फ्रीज करावे. फसवणूक झाल्याची माहिती सायबर पोलिसांच्या १९३० या हेल्पलाईन क्रमांकावर द्यावी, असे आवाहन करण्यात आले आहे.

अहमदनगर दि.4नोव्हेबर2023

नाशिक येथील लाचलुचपत
प्रतिबंधक विभागाच्या पथकाने नगरजवळील शेंडी परिसरात छापा टाकून बांधकाम विभागातील एका क्लास वन अधिकाऱ्याला मोठी रक्कम लाच स्वरूपात स्वीकारताना ताब्यात घेतल्याची प्राथमिक माहिती शुक्रवारी (दि. ३) रात्री उशिरा मिळाली. मात्र, याबाबत अधिकृत दुजोरा मिळाला नव्हता. रात्री उशिरा एमआयडीसी येथे लाचलुचपतचे एक पथक दाखल झाले होते.

नाशिक लाचलुचपत प्रतिबंधक विभागाकडे एका तक्रारदाराने लाचेसंदर्भात तक्रार केली होती. यावरून नाशिक लाचलुचपत विभागाच्या पोलिस अधीक्षक शर्मिठा वालावलकर यांचे पथक नगरमध्ये दाखल झाले. या पथकासोबत वालावलकर या रात्री उशिरापर्यंत शासकीय विश्रामगृहावर थांबून होत्या. एमआयडीसी पोलिस ठाण्याचे सहायक पोलिस निरीक्षक राजेंद्र सानप हेदेखील यावेळी उपस्थित होते.

एसीबीच्या पथकाने बांधकाम विभागातील एका अधिकाऱ्याला अहमदनगर- छत्रपती संभाजीनगर महामार्गावरील शेंडी बायपास येथून ताब्यात घेतले. सुमारे ७५ लाख ते एक कोटीच्या दरम्यान त्याच्याकडे रक्कम सापडल्याची प्राथमिक माहिती मिळाली. यामध्ये आणखी काही अधिकारी सामील असण्याची शक्यता असून, या अधिकाऱ्यांना अटक करण्यासाठी नाशिक एसीबीचे चार ते पाच पथके रवाना झाली होती; परंतु, याबाबत कोणतीही अधिकृत माहिती प्रशासनाकडून दिली गेली नाही. या घटनेचा पंचनामा करून एमआयडीसी पोलिस ठाण्यात गुन्हा दाखल करण्याची तयारी रात्री उशिरा सुरू होती. दरम्यान, लाचलुचपत प्रतिबंधक विभागाचे महासंचालक विश्वास नांगरे पाटील हेदेखील या गुन्ह्यावर बारकाईने लक्ष ठेवून होते. शनिवारी ते यासंदर्भात पत्रकार परिषद घेऊन माहिती देणार असल्याचे सांगण्यात आले.

श्रीगोंदा दि.2 नोव्हेंबर 2023

सहकारमहर्षी शिवाजीराव नारायणराव नागवडे सहकारी साखर कारखाना २०२२-२३ या वर्षासाठी दिवाळीसाठी ७५ रुपये सभासदांच्या खात्यात वर्ग करणार असून, एकूण २६०० रुपये भाव पूर्ण करणार आहे. तसेच, २०२३ – २४ च्या हंगामात येणाऱ्या उसाला पहिला हप्ता २५०० रुपये देणार असल्याची घोषणा नागवडे साखर कारखान्याचे अध्यक्ष राजेंद्र नागवडे यांनी केले.

सहकारमहर्षी शिवाजीराव नागवडे सहकारी साखर कारखान्याचा ४९ वा गळीत हंगामाचा शुभारंभ तालुक्यातील १०९ महिलांच्या हस्ते गव्हाणीत ऊसाची मोळी टाकून झाला. यावेळी नागवडे बोलत होते. जिल्हा बँकेच्या संचालिका अनुराधा नागवडे, नगराध्यक्षा शुभांगी पोटे, टिळक भोस यांच्या सह अनेक मान्यवर उपस्थित होते.

पुढे बोलताना नागवडे म्हणाले, की आपला सहकार साखर कारखाना शेतकरी सभासदांच्या जीवावर चालला आहे.. सहकार आणि खासगी कारखान्यांमध्ये मोठी स्पर्धा चालू आहे. जिल्ह्यातील उत्तरेत याचे प्रमाण कमी आहे, पण आपल्या भागात याचे लोन जास्त आहे. कारण, ऊसाला कमी जास्त भाव म्हणून शेतकरी आपला चांगला ऊस शेजारील खासगी कारखान्याला देतात,आणि खराब ऊस आपल्या सहकारी कारखान्याला देतात. त्यामुळे ऊसाला सभासदांच्या मनाप्रमाणे भाव देता येत नाही. तालुक्यातील शेतकऱ्यांच्या पाणीप्रश्नासाठी आम्ही आंदोलने करायची अन् तुम्ही पाणी अडवणाऱ्या पुणे जिल्ह्यात ऊस देता, हे योग्य नाही. खासगी कारखाने वेगवेगळी आमिषे दाखवून ऊस नेतील, पण बिलासाठी पुन्हा मागे पळावे लागेल, तसा तालुक्यातील शेतकऱ्यांना मोठा अनुभव आला असल्याचे ही ते म्हणाले.

अहमदनगर दि.2 नोव्हेंबर 2023

अहमदनगर : इंधनाच्या वाढत्या दराने इलेक्ट्रिक वाहनांना पसंती वाढत आहे. ही वाहने तुलनेने महाग पडत ‘असली तरी या इलेक्ट्रिक वाहनांची विक्री जोरात सुरू आहे. सणाच्या मुहूर्तावर नवीन वाहन खरेदी करण्याकडे नागरिकांचा कल वाढत आहे.

जिल्ह्यात दसऱ्याच्या मुहूर्तावर जवळपास दोन हजार नवीन वाहने रस्त्यावर आली. यात इलेक्ट्रिक वाहनांचेही प्रमाण वाढलेले आहे.

जिल्ह्यात २०१७ मध्ये वर्षभरात ही संख्या कमी होती. पेट्रोलचे दर परवडत नाहीत, अशी ओरड वाहनचालकांकडून होत आहे. त्यामुळे गेल्या दोन वर्षात नागरिकांचा ई-वाहनांकडे ओढा वाढला आहे. दुचाकीपासून तर बसपर्यंतची ई-वाहने जिल्ह्यातील रस्त्यांवर धावताना पाहायला मिळत आहेत.

अनेक ‘वेटिंग’वर

दसऱ्याच्या पार्श्वभूमीवर जिल्ह्यात शेकडो चारचाकींची विक्री झाली. यात दसऱ्याच्या दिवशीही मोठ्या प्रमाणात कारची विक्री झाल्याची नोंद आरटीओ कार्यालयात झाली आहे. मनपसंत चारचाकी खरेदी करण्यासाठी अनेक जण ‘वेटिंग’वर आहेत.

दसऱ्याला दोन हजार वाहनांची विक्री

जिल्ह्यात दसऱ्याच्या पार्श्वभूमीवर १५ ते २४ ऑक्टोबरदरम्यान तब्बल २ हजार ५०४ वाहनांची विक्री झाली. यात दसऱ्याच्या दिवशी वाहनांची मोठ्या प्रमाणात विक्री झाली आहे.

इलेक्ट्रिक वाहनांचा बाजारही सुसाट

पेट्रोल-डिझेलच्या वाहनांबरोबर इलेक्ट्रिक वाहनांचा बाजारही सुसाट आहे. दसऱ्याच्या मुहूर्तावर ई- दुचाकींची विक्री झाली, तर काही नव्या ई-कार रस्त्यावर आल्या.

साईबाबा संस्थानच्या इतिहासात एक धक्कादायक प्रकार समोर आला असून, चक्क साईबाबांच्या देणगी पावत्यांची अतिशय नियोजनबद्ध रित्या अफरातफर करत थेट बाबांच्या झोळीतून चोरीचा संतापजनक प्रकार घडला आहे. हा प्रकार साईबाबा संस्थानच्या कर्मचाऱ्याकडून घडल्याने, साईबाबा संस्थानचे प्रभारी लेखाधिकारी कैलास खराडे यांच्या फिर्यादीवरून शिर्डी पोलिस स्टेशनला या कर्मचाऱ्याविरुद्ध गुन्हा दाखल करण्यात आला आहे. यामुळे शिर्डीसह राज्यभरात मोठी खळबळ उडाली असून, या संतापजनक आणि भाविकांच्या श्रद्धेशी खेळणाऱ्या या कृतघ्न कर्मचाऱ्या विरोधात संतापाची लाट पसरली आहे.

साईबाबा संस्थानच्या लेखा शाखेतील कुशल कंत्राटी कर्मचारी दसरथ भगवंत चासकर रा. मलढोन,तालुका सिन्नर,जिल्हा नाशिक या कर्मचाऱ्यावर गुन्हा दाखल करण्यात आला आहे.

सदर घटना संस्थान प्रशासनाला अंतर्मुख करायला लावणारी असून, घडलेली हकीकत अशी की, साईबाबा संस्थानचे अध्यक्ष श्री सुधाकर यार्लागड्डा यांना एक निनावी पत्र प्राप्त झाले. व त्या पत्रात लिहिले होते की, साईबाबा संस्थानच्या देणगी काऊंटर येथे चोरीचा प्रकार होत आहे. या पत्राची तात्काळ दखल घेत अध्यक्ष महोदयांनी सामान्य प्रशासन साईबाबा संस्थानकडे सदर गोपनीय पत्र पाठवत चौकशीचे आदेश दिले असता मुख्य कार्यकारी अधिकारी यांनी लेखाधिकारी लंके यांना सदर पत्राच्या अनुषंगाने बारकाईने चौकशी करत अहवाल सादर करण्यास सांगितले. त्या चौकशीत समोर आलेली माहिती अतिशय धक्कादायक होती व संस्थान कर्मचारी दसरथ चासकर हा चक्क सीसीटीव्ही कॅमेरे समोर असताना अतिशय सफाईदारपणे गेल्या चार ते पाच वर्षांपासून देगणी पावत्यांमध्ये अफरातफर करत होता. भाविकांच्या देणगीतून पैसे चोरत असल्याचे व बनावट पावत्या भाविकांना देत भाविकांसह,संस्थान प्रशासन आणि पर्यायाने थेट साईबाबांची फसवणूक करत असल्याचे चौकशीत समोर आले आहे.

सदर कर्मचारी हा अतिशय नियोजनबद्ध चोरी करत होता. व त्यासाठी संस्थानच्या लेखा शाखा विभागाची प्री प्रिंटेड स्टेशनरी ही दशरथ चासकर याच्या ताब्यात होती. व त्याने भाविकांना देण्यात येणाऱ्या पावत्यांमधे विशिष्ठ फेरफार करत भाविकांना बनावट पावत्या दिल्या आहेत. तसेच एखाद्या पावतीचा क्रमांक त्याच्या मिळत्या जुळत्या पावतीशी मेळ साधत चक्क केमिकलचा वापर करत अखेरचा क्रमांक भाविकांच्या लक्षात येणार नाही, अश्या पद्धतीने खोडून हा चोरटा कर्मचारी बाबांच्या झोळीतील पैसे चोरत होता. शिर्डी पोलिस स्टेशनला दिलेल्या फिर्यादीत 12 हजार 678 रुपयांची चोरी दाखविण्यात आली असून गेल्या चार ते पाच वर्षांपासून हा प्रकार सुरू असल्याने या प्रकरणी सखोल चौकशी होऊन आतापर्यंत किती रुपयांची माया बाबांच्या झोळीत हात घालून या कर्मचाऱ्याने जमविली आणि यासोबत याचे आणखी लाभार्थी कोण..? कारण एकट्या कर्मचाऱ्याचे हे काम नाही. या आणखी काही कर्मचारी आहेत का..? हे सर्व पोलिसांच्या चौकशीत समोर येईलच, मात्र या कर्मचाऱ्याच्या संपत्तीची देखील चौकशी व्हावी अशी मागणी आता नागरिकांमधून होत आहे. तसेच या प्रकरणी आणखी काहीजण असल्याची संस्थान कर्मचाऱ्यांमध्ये दबक्या आवाजात चर्चा सुरू आहे. जर खरोखर आणखी कर्मचारी यात सामील असतील तर साईबाबा संस्थानचे कर्तव्यदक्ष अध्यक्ष या प्रकरणी लक्ष घालून थेट बाबांच्या झोळीत हात घालण्याची हिम्मत करणाऱ्यांवर कारवाई करतील का ? असा प्रश्न आता नागरिकांमधून आणि भाविकांमधून विचारला जात आहे.

तब्बल दोन हजार लाभार्थी महिलांना निर्धुर चुलीचा होणार फायदा 

कर्जत-जामखेडचे आमदार रोहित पवार यांच्या वाढदिवसानिमित्त मतदारसंघासह परिसरात विविध सामाजिक उपक्रमांचे आयोजन करण्यात येत आहे. अशातच ‘शाश्वत जगाची निर्मिती’ या प्रकल्पांतर्गत कर्जत व जामखेड तालुक्यातील गरजू महिलांना निर्धुर चूल वाटप कार्यक्रमाचे आयोजन करण्यात आले होते. या उपक्रमांतर्गत कर्जत व जामखेड मधील दोन हजाराहून अधिक ग्रामीण भागातील गरजू महिलांना निर्धूर चुलीचे वाटप करण्यात आले.

आमदार रोहित पवार यांच्या वाढदिवसानिमित्त आयआय केअर फाउंडेशन व कॅपजेमिनी यांच्या मदतीने आणि कर्जत-जामखेड एकात्मिक विकास संस्थेच्या माध्यमातून ‘शाश्वत जगाची निर्मिती’ या प्रकल्पाअंतर्गत गरजू महिलांना दोन्ही तालुक्यात स्वतंत्रपणे कार्यक्रम ठेवून निर्धूर चुलीचे वाटप करण्यात आले. या कार्यक्रमासाठी आमदार रोहित पवार, सौ.सुनंदाताई पवार यांच्यासह प्रमुख उपस्थिती म्हणून आय.आय केअर फाउंडेशनचे संचालक डॉ. संतोष भोसले तसेच सामाजिक कार्यकर्त्या सौ.सविताताई व्होरा यांची देखील उपस्थिती होती.

ग्रामीण भागातील तीन दगडाची चूल व मातीची चूल या चुलीमुळे आरोग्यावर घातक परिणाम होत असतो. त्यानुसार फुफुसांचे आजार, श्वसनाचे आजार, डोळ्याचे आजार देखील यामधून होण्याचा मोठा धोका संभवतो. परंतु निर्धूर चुलीमुळे 60 ते 70 टक्के धूर कमी होत असल्याने महिलांच्या आरोग्यावर होणारा घातक परिणाम देखील कमी होण्यास मदत होईल, यासोबतच निर्धूर चुलीला लागणारे सरपन हे बाकीच्या चुलीच्या प्रमाणापेक्षा 50% कमी लागते आणि सरपण कमी लागत असल्यामुळे वृक्षतोडही कमी होईल आणि यामुळे पर्यावरणावर त्याचा विघातक परिणाम होणार नाही. ग्रामीण भागातील गरीब महिलांना या निर्धूर चुलीच्या माध्यमातून मोठ्या प्रमाणात फायदा होणार आहे.

श्रीरामपूर येथे मुळा प्रवरा इलेक्ट्रिक को – ऑप सोसायटी लिमिटेडच्या ५०व्या वार्षिक सर्व साधारण सभेत ते बोलत होते.

या सभेच्या अध्यक्षस्थानी प्रशासक श्री रावसाहेब खेडकर, कार्यकारी संचालक श्री डी. पी.पाटील हे होते.

अहमदनगर जिल्ह्यात सध्या काही मंडळी सहकार संपविण्यासाठी काम करत आहे मात्र यातून सर्व सामान्य व्यक्ती तसेच शेतकरी संपला जातोय ही अत्यंत खेदाची बाब असल्याचे खा.डॉ.सुजय विखे पाटील यांनी सांगितले.

यावेळी बोलताना ते म्हणाले की सध्या कुठलीही सहकारी संस्था जीचा विखे पाटील कुटुंबाशी काही ना काही संबंध आला अशा संस्था बंद कशा पडतील यावर काही मंडळी दिवसरात्र काम करत आहेत. परंतु ते हे विसरत आहे की आमच्या कुटुंबियांनी त्या जिवंत ठेवल्या, त्यामुळे संस्थेशी निगडित कामगार, मजदुर, शेतकरी आणि त्यावर आधारित त्यांचा संसार हा चालला मात्र या लोकांनी आम्हाला विरोध करण्यासाठी या सर्वांच्या संसारावर पाणी फेरले. केवळ विरोधासाठी राजकारण करून सहकारी संस्था ह्या बंद पडण्याचा जो उद्योग काही मंडळी सातत्याने करत आहेत त्यामुळे शेतकरी, कामगार, मजदुर आणि त्यांचे कुटुंबीय हे उघड्यावर येत आहेत. ते जे हे पाप करत आहेत त्याची परतफेड ही त्यांना करावीच लागणार असून हीच जनता त्यांना त्यांची जागा दाखविल्याशिवाय राहणार नाही.

मुळा प्रवरा इलेक्ट्रिक को- ऑप सोसायटीचे काम अत्यंत चांगले चालविण्याचा आम्ही प्रयत्न केला मात्र त्यावरही प्रशासक आणले. यामुळे माझे काय नुकसान झाले नाही परंतु ह्या सोसायटीवर आधारित कामगार आणि त्यांच्या कुटुंबाचे मोठे नुकसान झाले. सध्या हे प्रकरण न्याय प्रविष्ट असून न्यायालयात सोसायटीचे मतदान कमी करण्यासाठी अनेकजण पुढे आले मात्र ही सोसायटी व्यवस्थित चालवून शेतकऱ्यांना , कामगारांना न्याय देण्यासाठी एकमेव नामदार राधाकृष्ण विखे पाटील प्रयत्नशील आहेत असे यावेळी त्यांनी सांगून मुख्यमंत्री श्री एकनाथ शिंदे, उपमुख्यमंत्री तथा ऊर्जामंत्री श्री देवेंद्र फडणवीस यांच्या कडे ही संस्था पुन्हा कशी उभारेल यासाठी प्रयत्न करत आहोत असे सांगितले.

या संस्थेसाठी कामगार , शेतकरी यांनीही पुढे येण्याचे आवाहन यावेळी विखे यांनी केले.

सभेच्या प्रारंभी कार्यकारी संचालक पाटील यांनी प्रास्ताविक करून सभेचे ठराव मांडले यास सर्वानुमते मंजूरी देण्यात आली.

या सर्वसाधारण सभेस माजी संचालक, सभासद यांची उपस्थिती होती.

मा.आ.राहुल जगतापांचे श्रीगोंदेकरांना मोठे आश्वासन, म्हणाले…

—

आपल्या पारदर्शी कामाबाबत कुकडी साखर कारखाना जिल्ह्यात चर्चेत असतोच मात्र आता माजी आमदार राहुल जगतापांनी पुन्हा सभासदांना सुखद धक्का दिला आहे. कुकडी कारखान्याच्या सभेत दिवाळीपूर्वी दुसरा हप्ता देण्याचे आश्वासन देत राहुल जगतापांनी सभासदांच्या टाळ्या मिळवल्या.

पिंपळगाव पिसा येथील कारखान्यावर २६वी सर्वसाधारण सभा झाली. त्यात कारखान्याचे अध्यक्ष राहुल जगतापांनी अनेक शेतकरी हिताचे निर्णय जाहिर केले. कारखान्याने एफआरपी एवढा भाव जाहिर केलाच आहे. आता आगामी हंगामात जिल्ह्यातील इतर कारखान्यांच्या स्पर्घेतला भाव देऊ, असे आश्वासन त्यांनी दिले. शिवाय तालुक्यातील शेवटचे टिपरू गाळप होईपर्यंत कारखाना सुरु ठेवण्याचा निर्णयही जाहिर केला.

कारखाना कायमच शेतकऱ्यांच्या पाठीशी असल्याचे राहुल जगतापांनी दाखवून दिले. उसतोडणी कामगारांना १० कोटींची आगावू रक्कम दिली असल्याचे सांगून त्यांनी सर्व उस उत्पादकांना दिलासा दिला. घनश्याम शेलार, बंडू जगताप, जयसिंग गावडे, बाजीराव घालमे यांसह शेतकरी व सभासद बहुसंख्येने उपस्थित होते.