महात्मा गांधी विद्यालयात महिला दिन उत्साहात साजरा
कर्जत दि.9 मार्च 2024
कर्जत येथील महात्मा गांधी विद्यालयात महिला दिन साजरा करण्यात आला.संपूर्ण जगभरात 8 मार्च हा दिवस महिला दिन म्हणून साजरा करण्यात येतो.
विद्यालयाच्या वतीने साहित्यिक, वैद्यकीय,शैक्षणिक व राजकीय अशा विविध क्षेत्रातील महिलांचा प्रातिनिधिक स्वरूपात सन्मान करण्यात आला. त्यामध्ये साहित्यिक क्षेत्रातील प्रसिद्ध कवयत्री स्वातीताई पाटील, वैद्यकीय क्षेत्रातील नामवंत डॉक्टर जयश्रीताई मुळे, राजकीय क्षेत्रातील चांदे बुद्रुक गावच्या आदर्श सरपंच पूजाताई सूर्यवंशी आणि कर्जत पंचायत समितीच्या गटशिक्षणाधकारी उज्वलाताई गायकवाड तसेच विद्यालयातील सर्व महिला शिक्षिकांचा सन्मान गुलाबपुष्प व पुस्तक भेट देऊन करण्यात आला.
“महिलांना समाजामध्ये मानाचे स्थान मिळत आहे याचा आम्हाला अभिमान वाटतो.महिलांनी आपल्या आरोग्याची काळजी घ्यावी”,असे वक्तव्य प्रमुख अतिथी डॉक्टर जयश्रीताई मुळे यांनी केले. तर पूजाताई सूर्यवंशी यांनी आपल्या मनोगतामधून “आपण स्री जन्माचे स्वागत केले पाहिजे.आपली आई, बहिण तसेच समाजातील इतर मुलींनाही आपण सन्मानाची वागणूक दिली पाहिजे”,असे प्रतिपादन केले.
“स्त्रियांची काळानुरूप प्रगती कशी झाली याची माहिती गटशिक्षणाधिकारी उज्वला गायकवाड यांनी दिली. विद्यार्थ्यांनी दररोज आपल्या आईचे दर्शन घेऊनच शाळेत यायचं” असे आवाहन त्यांनी केले.
याप्रसंगी विद्यालयाचे ज्येष्ठ शिक्षक भालचंद्र देशमुख,किशोर कर्पे व सर्व सेवकवृंद उपस्थित होते.कार्यक्रमाचे प्रास्ताविक विद्यालयाचे प्राचार्य राजकुमार चौरे यांनी केले तर आभार प्रदर्शन उपप्राचार्य लालासाहेब शिंदे यांनी केले. कार्यक्रमाचे सूत्रसंचालन परशुराम गांगर्डे,अनिल सोनवणे यांनी केले.
माता-भगिनींना सन्मानाची वागणूक देणे प्रत्येकाचे कर्तव्य आणि जबाबदारी आहे-
प्राचार्य राजकुमार चौरे,
महात्मा गांधी विद्यालय, कर्जत.
